Thursday, December 24, 2009

Хөөрхөн бичлэг



Хүний амьдралд инээд баясал, хайр энэрэл, бие биеэнээ ойлгох, урам өгөх хичнээн чухал болохыг энэхүү бичлэгт их хөөрхөнөөр харуулсан байнаа. (Always smile:-))

Wednesday, December 23, 2009

Untitled

Өчнөөн сараар ороогүй блог минь сайн байна уу,

Ойрдоо гэж, би ер нь оны эцэст л блогоо санадаг юм шиг байнаа даа!? Улиран одож буй ондоо юу хийж бүтээв, ирж буй он жилүүдэд юу хийхээр төсөөлөн мөрөөдөж, төлөвлөж байгаагаа баттай сайн санахын тулд л блог дээрээ бичих гэж орж ирдэг юм уу даа. Бусад үед нь худлаа завгүй царайлаад л хэхэ. Заримдаа ч үнэхээрийн завгүй ч (юм шиг) байдаг л даа хөөрхий...

2009 онд би ер нь бас ч үгүй өөрийн амьдралдаа өөрчлөлт, шинэчлэлтүүдийг нээх чамлаад байхааргүйгээр л хийсэн юм шиг байнаа бодоод байсан чинь. Уул нь илүү сайнаар хийх боломж байсан л даа. Гэхдээ яахав ямар ч байсан ухраагүй, урагшилсан гэж бодож байна шүү.
2010 онд би илүү ихийг хийхийг, илүү ихийг бүтээж бий болгохыг хүсч байна. Өмнөх жилүүдэд бодоод хийж чаддаггүй байсан 2 зүйлийг заавал хийх болно. Ер нь хүн боломжийг байнга өөрөө бий болгож байх хэрэгтэй юм байна гэж ойлгох болсон. Ер нь 2009 онд миний амьдралд 7 өөрчлөлт ч гэдэг юм уу шинэ зүйл хийгдсэн юм байна. 2010 ондоо илүү идэвхитэй, илүү эрч хүчтэй, бусдад тус дэм болсон, өөрийн хүсэл мөрөөдлүүдээ алхам алхамаар биелүүлэх зүйлсийг хийх болноо.

Сүүлийн үед аливаа зүйлст их тогтуун, тайванаар хандаж өөдрөг гэрэлтэй бүхнээр бүгдийг төсөөлөх болсондоо Бурханы ном судар, багшдаа маш их талархаж байна(багийн л өөдрөг үзэлтэй хүүхэд байсын). Хүний амьдрал богинохон, үдлээд өнгөрөх төдхий ч бусдад тустай үйл хийх нь ямар сайхан аз жаргал, завшаан бэ. Эмийн зааврыг уншаад өвчин эдгэдэггүй шиг сайн номыг дан сонссон нь хангалтгүй юмаа, ирэх ондоо сурсан дуулсан бүхнээ амьдрал ахуйдаа, өдөр тутмын алхан бүртээ мөрдлөг болгон амар амгаланг мэдрэн амьдрах болноо.

За ингээд өөрөө өөртөө амжилт хүсье. Сансан зорьсоноо заавал хийгээрэй. Good Luck

Friday, August 28, 2009

Сургааль

Өглөө болгон эртлэн босч
Өндөр тэнгэрийг бүрэн харж бай
Огторгуй хурмаст уужмын хутгаа
Оюун ухаанд чинь хайрлах болно
Оройн бүхэн нэгийг санаж
Одот eртөнцийг хүндэтгэн харж бай
Эрхэст гариг үзэсгэлэнт сүлдээрээ
Үүрд таныг хайрлах болно
Алтан нарыг мандах тоолонд
Алаг зүрхнээсээ догдлон харж бай
Эндэгдэлгүй дэгжихийн учир тавилангаар
Эрдэнэт бөмбөлөг гийх болно
Ухаант хүн та хаа ч явсан
Уулсын оргилыг хүндэтгэн харж бай
Баян буурал хангайн хишгээр та
Бат түвшин явах болно
Учирсан бүхнийхээ нүүр царайг
Уяхан даруухан инээмсэглэн харж бай
Өнөр өтгөн урт удаан наслахын
Өлзий буян бүрдэх болно

Говийн ноён догшин хутагт
Дулдуйтын Данзанравжаа

*************************

Өсөхийн цагт санууштай нь
Бишрэл, хичээл, сэтгэл гурав
Өөдлөхийн тулд нягтлууштай нь
Сургааль, үнэн, үлгэр гурав

Ачлахын дээдээр ачлууштай нь
Ээж, аав, эх орон гурав
Асрахын дээдээр асрууштай нь
Өтгөс, нялхас, хань гурав

Ялахын түрүүнд ялууштай нь
Бие, хэл, сэтгэл гурав
Яруу төгс сурууштай нь
Яриа, дуу, хөгжим гурав

Эгшин бүрийд цэгнүүштэй нь
Бие, хэл, сэтгэл гурав
Эгнэгд тордож явууштай нь
Билэг, ухаан, чадал гурав

Бадарч дээшлэхийн үндэс нь
Сэрэх, санах, тэмүүлэх гурав
Баларч дордохын тэмдэг нь
Унтах, мартах, тэрслэх гурав

Ажиллах цагийн хэмнэл нь
Өглөө, өдөр, орой гурав
Амьдрах цагийн хэмжээ нь
Балчир, идэр, өтөл гурав

Мөчид хоосны жишээ нь
Өнгө, мөнгө зэрэглээ гурав
Мөнх бусын дохио нь
Өтлөх, элэх, буурах гурав

Ажил бүтээхийн эрэмбэ нь
Мэдлэг, чадвар, дадал гурав
Аливаа шинжээс эрхэм нь
Мэргэн, түргэн, даамай гурав

Тэтгэх горимын эх нь
Наран, саран, хайр гурав
Тэжээх шимийн үндэс нь
Гал, ус, газар гурав

Үйл бүхнээс эрхэм нь
Бодох, туурвих, дэмжих гурав
Үнэн бүхний туйл нь
Төрөх, орших, үхэх гурав

Говийн ноён догшин хутагт
Дулдуйтын Данзанравжаа

Wednesday, January 21, 2009

Асар их итгэл, үүрэг хариуцлага


Барак Обамагийн ажил үүргээ хүлээж авах, тангараг өргөх ёслолыг бараг дэлхий нийтээрээ баярлан, бахархан интернэт болон ТВ-гээр үзсэн байх аа. Обамагийн ярианаас болон тухайн үйл ажиллагаанаас дараах сэтгэгдэл төрж, өөрийн эрхгүй хэдэн өгүүлбэр бичихээр шийдлээ.

1. Тэд мөрөөдөж чаддаг. Мөрөөдлөө биелүүлэх шударга нийгэмтэйгээ харууллаа.
2. Дэлхийн бараг өнцөг булан бүрээс ирж нэг гэр бүл болж, агуу их эв нэгдэл, эрх чөлөөний төлөө нэгэн үзүүрт сэтгэлтэй байж чаддагаа харууллаа.
3. Хүнд ямар их итгэл хүлээлгэж, хариуцлага үүрүүлж чаддагийг харууллаа.
4. Оюун ухаан, гоо сайхан, хатуу хэрнээ хайраар гэрэлтсэн залуу гээд л их л олон дүрийг нэг хүнээс харж болдогийг мөн харууллаа.

Одоо түүнд хийх л үлдлээ, Бурхан өршөөг.

Saturday, January 10, 2009

БОДОЛ - 2

Хүн төрөлхөтний хүсэн хүлээж, бий болгохыг мөрөөддөг зүйлсийн нэг бол яахын аргагүй эрх чөлөө, өөрийн хүслээр, мөрөөдлөөр амьдрах гэдэг нь бидний өнгөрсөн түүхээс харж болно. Өөрийн хүссэн ажлаа хийх, хүссэн машинаа унах, хүссэн газраа амьдрах, хайртай хүнтэйгээ суух, дуртай зүйлсээ бусдаас зөвшөөрөл авалгүйгээр хийх /хүний эрхийг зөрчсөн зүйлс биш!/, хүссэн бүлэглэлээ үүсгэх, түүнд хамрагдах /найз нөхдийн, Singles' club (хэ хэ), гадаад хэлээр яригчдын клуб г.м /, сонгох, сонгогдох эрх зэрэг өөрийн юу хийе гэсэн түүнийгээ хийж сайхан амьдрахыг хүсдэг.
Гэтэл үнэн хэрэгтээ бид эрх чөлөөтэй, хүссэнээрээ байж чаддаг уу? Хэдийгээр эдгээр зүйлс нь эрх чөлөөтэй байдлыг илэрхийлэх нэг хэсэг боловч бид зөвхөн тэдгээрээр л өөрсдийгөө эрх чөлөөтэй хүн гэж хэлж болох уу?
Бид дуртай зүйлсээ хийж байна гэдэг ч бусдыг дуурайдаг, өөрийн хүссэн машинаа унаж байна гэдэг ч бусдаас доогуур орохгүйн тулд л илүүг унахыг хүсдэг, өөрийн үзэл бодлоо чөлөөтэй илэрхийлдэг, хамгаалдаг гэдэг ч үнэндээ тэр үзэл бодолдоо боймлогдсон байдаг, би эрх мэдэлтэй, эрх чөлөөтэй хүн гэдэг ч үнэндээ нэр алдар, олны хэл аманд дарамтлуулж, өөрийнхөө мөнгөндөө хүлэгддэг. Бидний дунд бусдаас, тэдэнд юу гэж харагдахаас, тэр тусмаа амьгүй, үнэн чанартэй хоосон эд зүйлсээс хамаардаг амьдралтай хүмүүс их байх юм. Тэр хүн эрх чөлөөтэй гэх нийгэмд амьдарч байгаа боловч, үнэндээ ..... ?
Бусдын онгироосон, магтсан, хорон үгэнд өөрийн үндсэн мөн чанараа алддаггүй, би л ажилдаа хайртай, дуртай гэж гэр бүл, өөрийн эрүүл мэндийг умартан ажилдаа хүлэгддэггүй, өөрт таалагдсан, таалагдаагүй үйлдлүүдэд уурлан бухимддаггүй, яг л нөгөө шүлгэн дээр өгүүлдэг шиг Тэнгэр шиг л байдаг хүн жинхэнэ эрх чөлөөтэй хүн юм уу даа хэмээн бодохын. Өөрийн хүссэн зүйлстээ хаалт тавилгүйгээр цаг гаргацгаая залуусаа.

Цаг гарга /мэргэн үг, шүлэг/

Бяр чадлын ундарга тул бодож сэтгэхэд цаг гарга

Бага залуу харагдах тул тоглож наадахад цаг гарга

Орчлонгийн жам єpшєєлгvй тул мєргєж сvсэглэхэд цаг гарга

Оюун ухаан дундаршгvй тул уншиж мэдэхэд цаг гарга

Ариун хайр бурхных тул хайр сэтгэлдээ цаг гарга

Зvрх сэтгэлийн дуулал тул инээж баясахад цаг гарга

Зvдрэх цаг ээлжтэй тул єглєг хишигт цаг гарга

Хєлс бvхэн шагналтай тул ажил хєдєлмєрт цаг гарга

Хvрэх диваажин нэхэлтэй тул буян хураахад цаг гарга

Thursday, December 25, 2008

БОДОЛ - 1

Өнөөдөр Христмасийн баярын өдөр. Шинэ он гарахад 6 хоног үлдлээ. Хүн бүр, байгууллага бүхэн дор бүрдээ өөр өөрсдийн энэ онд хийж бүтээсэн ажлаа цэгнэж, ирэх жилийнхээ төлөвлөгөөг гаргаад завгүй /бас баяраа тэмдэглэх гээд :-) /.
Би тэгсэн чинь, бодоод байхаар нөхцөл байдлаа сайн шинжлээгүй ч юм уу, өөрийн хөөрсөн сэтгэлээрээ их л том юм хийнэ гээд төлөвлөөд бичээд байдаг юм уу, эсвэл юу ч хийдэггүй хүн юм уу бүү мэд ээ. Өдөр хоногийг зүгээр юу ч хийлгүй идэж, унтаж өнгөрөөгөөгүй л санагдахын. Тэгсэн жилийн эцэст үр дүн гэж алга. Осолдохгүй л амьд байж. хэхэ. Инээд ч хүрэх шиг, нэг бол уйлмаар ч юм шиг. Над шиг ингэж үр бүтээлгүй он жилүүдийг өнгөрөөгч нь цөөхөн байгаасай.
Урвайж суухгүй шүү. Хүн алдаж болно, харин тэрийгээ ойлгоод алдсан алдаагаа л дахин давтахгүй байх хэрэгтэй. 2009 онд илүү бодитой, өөрийн хүчийг бас дайчилсан тийм л зорилго тавина аа. Хамгийн гол нь бас түүнийгээ өдөр бүр харж миний энэ хийж байгаа зүйл маань зорилготой маань нийцэж байна уу?, түүнийгээ гүйцэлдүүлэхэд минь энэ тус болох уу гэдгийг сайн тунгааж, шүүж бодож байх хэрэгтэй юм байна. Хүнд ер нь зориг, риск гаргах чадвар маш их хэрэгтэйг сүүлийн үеүүдэд их ойлгож байна. Хэрэггүй зүйлд цагаа үрж, жилийн эцэст сэтгэлээр унамааргүй л байна шүү :-). Өөрөө өөртөө амжилт хүсье.

Saturday, December 6, 2008

Үнэн үгтэй шүлэг

Хамаг бүгдээр чамайг
Харааж нулимж байвч, тэнгэр шиг бай!
Хамгийн сайн хүмүүс гэж
Хашгирч ерөөж байвч, тэнгэр шиг бай!

Тэвчээр барагдаж, нөхөд чинь орхивч
Тэнгэр шиг бай, мөнхөд амгалан...
Тэргэнд суулгаж, алтан титэм өмсгөвч
Тэнгэр шиг бай, юу ч болоогүй юм шиг...

Хамгийн хайртай хүн чинь хаяж одсон ч
Хан тэнгэр нурчхаагүй цагт, бүү зов!
Гүтгэж, доромжилж бахаа ганц хангавч
Гүн тэнгэр хэмхрээгүй цагт, бүү ай!

Өвчин зовлонд нэрвэгдэж, тартагтаа тулавч
Өнө мөнхийн тэнгэр шиг бай, чи ялна
Өрөөл бусдад тоогдохоо байж, мартагдавч
Өндөр тэнгэр дээр чинь цэлийж буйг бүү март!

Яг л амьдрал чинь дуусаж, явах замгүй болсон ч
Яадгаан алдалгүй хүлээ, тэнгэр шиг бай!
Яруухан санаа мехөсдөж, хулгай зэлгийд өртсөн ч
Ядмагхан амьтдыг бүү тоо, тэнгэр шиг бай

Олз омог чамд үүдээ хаасан ч тэнгэр шиг бай
Олон түмэн нүүрээ буруулсан ч тэнгэр шиг бай
Одод гялалзаж, наран саран ээлжлэх цагт
Орчлон дээр аавын хүү шантрах ёсгүй!...

Уур омог урин мунхгийг мартаж, тэнгэр шиг бай
Уйтан хорвоогоос илүү гарч, жигүүрээ дэлгэ...
Цөхрөл чамайг багалзуурдаж, цөлийн чоно шиг болгосон ч
Цөс ихтэй хүний үр гэдгээн бүү мартаарай!...

Цорын ганц хүү минь, бас охид минь, хүүхдүүд минь
Цохолж ирэх үйлийн үрээс бүү зугт, бүү ай!...
Хувь заяатай ямагт эвлэрч, тэвчээртэй бай...
Хуучин цагийн мэргэд хүлээж сурсан юм шүү!...

Орох оронгүй болсон цагтаа орчлонг бүхэлд нь олно, чи!
Онцлох нөхөргүй болсон цагтаа , хүнийг бас ойлгоно чи !
Аз жаргал ирнэ гэвч , удалгүй алга болдог юм
Аюул зовлон тохионо гэвч , төдөлгүй арилдаг юм ...

Жамаараа ертөнцөд юм бүхэн өдөр , шөнө шиг ээлжилнэ
Жаргал зовлонгийн алинд ч , мөнх тэнгэр шиг бай !...
Атаатан түмэндээ мууг үйлдэвч , хариуд нь сайныг бүтээ .
Ариун сэтгэлийн нугад буяны цэцэгс дэлгэрдэг юм ...

Ямагт чиний зөв байх албагүй , сайтар тунгаа
Ярьж хэлэх , хөдлөх бүхнээ өерөө хяна , сэтгэ
Хүсэл бүхэн биелэх албагүй , чандалж хорь,
Хүрэхийн эцэсгүй тэнгэр шиг бай, үнэнийг тэмтэр!...

Юм бүхэнд өөрийн цаг буй, сөрөөд нэмэргүй
Юлд атгасан хүн тулаанд хэрэгтэй, хуриманд нэмэргүй
Нохой болохоос нь өмнө гөлгийг хазаж хэмлэдэг юм...
Ноён болохоос нь өмне хөвгүүнийг басаж доромжилдог юм

Самуун дэгдээгчид үйлээн тайван хийг
Сандарч тэвдэх хэрэггүй тэнгэр шиг бай !
Салхи цагаан болохоор бүхнийг хийсгэдэг юм
Саваагүй амьтдын зиндаанд бүү уна !...

Эрх мэдэлтэй хүн хилэнц нүглээс зайлахгүй
Эд баялагтай хүн хүсэл шуналаас хагацахгүй
Ертөнцийн бүх юм хэмжээтэйг бүү март
Ер цагаа болохоор хумхийн тоос шиг сарнина

Энгийн хүн ардад ээлтэй бай, хайртай бай
Элдэв бусармаг явдалд бүү орооцолд!...
Үнэтэй цайтай бүхнээ бусдад өгч сур, бүү харамс
Үүрд оршихгүйн учир тус болох үйл бүтээ!...

Гаднаан ямагт бусдаас доорд бай, даруу бай
Гайхуулах хэрэггүй, дотроон тэнгэр мэт агуу бай!
Үг яриа хэрэггүй газарт харцаараа өгүүлж сур,
Үнэн худлыг ялгах аргагүй цагт бурхандаа залбир!

О.Дашбалбар